کہتے ہیں کہ چور اور سانپ کا نام ہی انسان کو دہشت زدہ کر دیتا ہے اور اگر یہ کہا جائے کہ دوسرے جان داروں میں سانپ کو انسان کا سب سے خطرناک دشمن سمجھا جاتا ہے تو شاید بے جا نہ ہو۔ اس لیے یہ سوچنا کہ سانپ ہمیں کون سے فائدے دیتا ہے، بڑا عجیب بلکہ کسی حد تک حماقت لگتا ہے۔ لیکن قدرت نے کوئی چیز بھی ایسی پیدا نہیں کی جو ہمارے لیے فائدہ بخش نہ ہو اور یہ حقیقت ہے کہ سانپ بھی کئی پہلوؤں سے ہمارے لیے مفید ہیں۔
جی ہاں! سانپ ہمارے لیے بہت مفید ہیں۔ کیوں کہ یہ گھریلو چوہوں، سحرائی چوہوں اور نقصان دہ کیڑوں کو کھاتے ہیں۔ یہ بات سچ ہے کہ سانپ پرندوں کے بچوں اور فائدہ مند مینڈکوں کو بھی کھا جاتے ہیں لیکن ان کے بہت سے اچھے کام، ان کی چند برائیوں کی تلافی کر دیتے ہیں۔ سانپ کی کھال عورتوں کے دستی بیگ اور جوتے بنانے کے کام آتی ہے۔
